ಅನಾಥ ಕನಸು

ಕೈಯಲ್ಲಿ ಆಟಿಕೆ ಹಿಡಿದು ತಮ್ಮನ ಜೊತೆ ಆಡಿ

ದಿನವು ಹೊಟ್ಟೆತುಂಬ ಕೈತುತ್ತೂಟವ ಮಾಡಿ 

ಅಮ್ಮನ ಮಡಿಲಲಿ ಬೆಚ್ಚಗೆ ಮಲಗಿದಹಾಗೆ 

ಆಡುವಾಗ ಅಜ್ಜಿ ಎಳೆದೊಯ್ದು ಸ್ನಾನ ಮಾಡಿಸಿ 

ಎಣ್ಣೆ ಹಚ್ಚಿ,ತಲೆ ಬಾಚಿ, ಹೂ ಮುಡಿಸಿ 

ಹಣೆಗೆ ದೃಷ್ಟಿ ಬೊಟ್ಟು ಇಟ್ಟಹಾಗೆ

ಅಪ್ಪನ ಕೈ ಹಿಡಿದು ಜಾತ್ರೆಯಲಿ ಸುತ್ತಾಡಿ 

ಮಿಟಾಯಿ ತಿನ್ನುತ್ತ ಜೋಕಾಲಿಯಲಿ ಆಡಿ 

ಕಂಡ ಕಂಡದ್ದನ್ನು ಕೊಡಿಸು ಎಂದು ಪೀಡಿಸಿ ಏಟು ತಿಂದಹಾಗೆ 

ಹೆಸರು ಚಿಕ್ಕದು ಮಾಡಿ ಪ್ರೀತಿಯಿಂದ ಕೂಗಿ ಬಳಿಗೆ ಕರೆದು 

ತನಗೆಂದು ಕೊಡಿಸಿದ ಗೊಂಬೆಯನ್ನು ನನ್ನ ಕೈಗಿಟ್ಟು

ನನ್ನ ಕಣ್ಣೋರಸಿದ  ಅಣ್ಣ ಹಣೆಗೆ ಮುತ್ತಿಟ್ಟ ಹಾಗೆ 

ಪಾಟಿ,ಪೇಣಿ,ಪುಸ್ತಕ,ಪೆನ್ನು ಇರುವ ಚೀಲ ಹೊತ್ತು 

ಶಾಲೆಯ ಬಟ್ಟೆ  ಉಟ್ಟು  ದಿನವೂ ಶಾಲೆಗೆ ಹೋಗಿ 

ಸ್ನೇಹಿತರ ಗುಂಪಿನಲ್ಲಿ ಆಟ ಆಡಿದ ಹಾಗೆ 

ಆಸೆಗಳ ಮೂಟೆ  ಬಿಚ್ಚಿ ಅಂಗಳಕ್ಕೆ ಹರಡಿ ಕೂತೆ 

ಕನಸುಗಳೆಲ್ಲ ನನಸಾಗಿ ಕಣ್ಣೆದುರು ನಿಂತಂತೆ 

ಕನಸು ಕಂಡೆ  ಅನಾಥ  ಕನಸು ಕಂಡೆ 

                                                    ಆರ್ ಆರ್ ಅಶಾಪುರ್

ಮತ್ತೆ ಬಾ ನೀನು

ನಿನ್ನ ದನಿ ಇಲ್ಲದ ಸದ್ದನು
ಕೇಳ ಬಯಸೆನು ನಾನು
ನೀನಲ್ಲದ ಮುಖವನು
ನೋಡ ಬಯಸೆನು ನಾನು

ನಿನ್ನ ಕೈ ನನ್ನ ಕೈಯೋಳಗಿರದೆ
ತುಸು ದೂರವು ನಡೆಯಲಾರೆನು ನಾನು
ನನ್ನ ಜೊತೆ ನೀನಿರದಿದ್ದರೆ
ಸ್ವಲ್ಪವೂ ನಗಲಾರೆ ನಾನು

ನೀನಿಲ್ಲವೆನ್ನುವ ಕಹಿ ಸತ್ಯವ
ನುಂಗಿ ಬದುಕಿರಲಾರೆ ನಾನು
ಸತ್ತವರ ಬದುಕಿಸುವ
ಸಂಜೀವಿನಿಯಾಗಿ ಮತ್ತೆ ಬಾ ನೀನು
                                           ಆರ್ ಆರ್ ಆಶಾಪುರ್

ಬಿಡುವು ಕೊಡದೆ ಕಾಡಿದೆ.

ನಿನ್ನ ಬಳೆಯ ನಾದಕೆ
ಮನಸು ತಾಳ ಹಾಕಿದೆ
ನಿನ್ನ ಕಾಲ್ಗೆಜ್ಜೆಯ ಸದ್ದಿಗೆ
ಹೃದಯ ಹೆಜ್ಜೆ ಹಾಕಿದೆ

ತುಟಿ ಅಂಚಿನ ಮುಗುಳ್ನಗೆ
ಕಣ್ಣ  ತುಂಬಾ ತುಂಬಿದೆ
ನಿನ್ನ ಮಧುರ ದ್ವನಿ ಅದು
ಕಿವಿಯ ಒಳಗೆ ಗುನುಗಿದೆ

ಊಟ ನನ್ನ ಮೇಲೆ ಮುನಿದು
ನಿದುರೆ ದೂರ ತಳ್ಳಿದೆ
ಹಗಲು ಇರುಳು ನಿನ್ನ ನೆನಪು
ಬಿಡುವು ಕೊಡದೆ ಕಾಡಿದೆ.
                            ಆರ್.ಆರ್.ಆಶಾಪುರ್

ಹೇಗೆ ಬುದ್ದಿ ಹೇಳಲಿ ?

ವಯಸು ಹದಿನಾರಾಗಿದೆ,ಹರೆಯ ಬಂದು ಕಾಡಿದೆ
ನನ್ನ ಮಾತೇ ಕೇಳದೆ ಮನಸು ಹಿಡಿತ ತಪ್ಪಿದೆ
ಅಂಕೆ ಇರದ  ಅಶ್ವಕೆ ಹೇಗೆ ಕಡಿವಾಣ ಹಾಕಲಿ
ನನ್ನೇ ಮರೆತ ಮನಸಿಗೆ ಹೇಗೆ ಬುದ್ದಿ ಹೇಳಲಿ

ದಿನವು ಪೇಟೆ ಬೀದಿಲಿ ನನ್ನ ದಾರಿ ಕಾಯುವ
ನನ್ನ ಬೆನ್ನ ಹಿಂದೆಯೇ ಕದ್ದು ಮುಚ್ಚಿ ಬರುತಿಹ
ಅವನೆಡೆ ಮನಸು  ಜಾರಿದೆ ನನಗೆ ಸುಳಿವೇ ನೀಡದೆ

ಶಾಲೆ ಬಿಡುವ ಸಮಯಕೆ ಗೇಟಿನಲ್ಲಿ ನಿಂತಿರೋ
ದೊಡ್ಡ ಗುಂಪಿನಲ್ಲಿಯು ನನ್ನೇ ಹುಡುಕಿ ನೋಡಿರೋ
ಅವನೆಡೆ ಸಾಗಿದೆ ಮನಸು ಹಿಂದೆ ತಿರುಗಿ ನೋಡದೆ

ನನ್ನ ಮಾತೇ ಕೇಳದೆ ಮನಸು ಹಿಡಿತ ತಪ್ಪಿದೆ
ನನ್ನೇ ಮರೆತ ಮನಸಿಗೆ ಹೇಗೆ ಬುದ್ದಿ ಹೇಳಲಿ
                                 ಆರ್. ಆರ್. ಅಶಾಪುರ್

ನೆನಪು

ಕಷ್ಟಗಳನ್ನೆದುರಿಸಿ ನೊಂದ  ದಿನಗಳ
ನೋವು ತುಂಬಿದ ಘಟನೆಗಳ
ಮಾಸಿಹೋದ ಗಾಯಗಳ
ಕೆದುಕಿ ನೋಯಿಸುವುದು ನೆನಪು

ಕಳೆದು ಹೋದ  ಸಂಬ್ರಮದ ಕ್ಷಣಗಳ
ಉಲ್ಲಾಸವ ತಂದ ವಿಷಯಗಳ
ಮರೆಯಾದ ಮಂದಹಾಸಗಳ
ಪುನಹ ಹೊತ್ತುತರುವುದು ನೆನಪು

ಗತಕಾಲದ ನೋವುನಲಿವಿನ ಸಂಗತಿಗಳ
ಕ್ಷಣಾರ್ದದಲಿ  ಕಣ್ಣೆದುರು ತಂದಿಟ್ಟು
ವರ್ತಮಾನದಿಂದ ಬದಿಗೊತ್ತಿ ನಮ್ಮನು
ಭೂತಕಾಲಕ್ಕೆ ಕರೆದೊಯ್ಯುವುದು ನೆನಪು
                 
                                ಆರ್. ಆರ್. ಅಶಾಪುರ್

ನೆಮ್ದಿ ಕೊಡೋರ್ ಯಾರು ?

ದುಡ್ಡು ಐತೆ ಬಂಗ್ಲೆ ಐತೆ ಓಡಾಡೋಕೆ ಕಾರು
ಇಷ್ಟೆಲ್ಲಿದ್ರು ನಿನ್ ಮನ್ಸಿಗ್  ನೆಮ್ದಿ ಕೊಡೋರ್ ಯಾರು ?

ಭಂದ್ಗುಳ್ ಎದ್ರಿಗ್ ಬಂದ್ರೆ ಮಾತಾಡ್ತಾರ್ ಹಲ್ಲು ಕಿರ್ದು
ಮುಂದುಕ್ ಹೊದ್ಮೆಲ್ ಬೈಕೊತಾರ್ ಬಿನ್ನಿಗ್ ತಿವ್ದು ತಿವ್ದು
ಹಬ್ಬ ಔತ್ಣ ಏನೇ ಇರ್ಲಿ ಬರ್ತಾರ್ ರೆಡಿಯಾಗಿ
ಕಷ್ಟದಲ್ಲಿ ಸಹಾಯ ಕೇಳಿದ್ರೆ  ಅಂತಾರ್  ದೂರ ಹೋಗಿ

ಸ್ನೇಹಿತ್ರೆಲ್ಲ ಜೊತೆಗೆ ಅನ್ನೋದ್ ಓದೋವರ್ಗು ಅಷ್ಟೇ
ಕೆಲ್ಸಾ ಸಿಕ್ಮೆಲ್  ದೂರಾಗ್ಬೇಕು ಈ ದುನಿಯಾದ ಕಥೆ ಇಷ್ಟೇ
ಭೂಮಿಮೇಲೆ ಒಳ್ಳೆ ದೊಸ್ತ್ರು ಸಿಗೋದ್ ಕಷ್ಟ ತಮ್ಮ
ಸಿಕ್ರುನೂವೆ ಜೊತೇಲ್ ಇರೊಂಗ್ ಬರಿಯಲ್ಲ ಆ ಬ್ರಮ್ಮ

ತಂದೆ ತಾಯಿ ಪ್ರೀತಿಯಲ್ಲ ಮದ್ವೆ ಆಗೋ ಗಂಟ
ಮದ್ವೆ ಆದ್ಮೇಲ್ ಅಂತಿರ್ತಾರೆ ಮಗ ಬದ್ಲಾಗ್ಬಿಟ್ಟ
ಹೆಂಡ್ತಿ ಪರ್ವಾಗ್ ಮಾತಾಡಿದ್ರೆ ಇವ್ರಿಗ್ ಹಿಡ್ಸಕಿಲ್ಲ
ಹಂಗಂತೇಳಿ ಅವ್ರ್ಕಡೆ ಹೋದ್ರೆ ಇವ್ಳು ಸುಮ್ನಿರಾಕಿಲ್ಲ

ಹಿಂಗಿರ್ವಾಗ ನೆಮ್ದಿಯಿಂದ ಹೆಂಗಿರ್ತೈತಿ ಬಾಳು
ನೆಮ್ದಿ ಇಲ್ದೆ ಕಾರು ಬಂಗ್ಲೆ ಇಟ್ಗಂಡ್ ಏನ್ ಮಾಡ್ತಿ ಹೇಳು
ಕಾಲಕ್ ತಕ್ಕಂಗ್ ನಡಿಲೇಬೇಕು ಅನ್ನೋ ಮಾತು ನಿಜ
ಸಂಭಾದನ್ನೋ ಕಾಲು ಮುರುದ್ರೆ ನಡಿಯೋದೆಂಗೆ ಮನುಜ ?

                                             ಆರ್. ಆರ್. ಅಶಾಪುರ್

 (ಆಡು ಭಾಷೆಯಲ್ಲಿ ಬರೆಯಲು ಪ್ರಯತ್ನಿಸಿದ್ದೇನೆ ತಪ್ಪಿದ್ದಲ್ಲಿ ದಯವಿಟ್ಟು ಕ್ಷಮಿಸಿ )

ಕಣ್ಣೋಟ

ನನ್ನ ಮನದಲಿ ಮನೆ ಮಾಡಿದೆ
ಮನೆಗೆ ನಂದಾದೀಪವಾದೆ
ನಿನ್ನ ಒಂದೇ ನೋಟದಲಿ

ಪ್ರೇಮ ವಿಜ್ಞಾಪನೆಗೆಂದು
ನಿಂತೇ ನಿನ್ನೆದುರು ಬಂದು
ಭಯದಿ ಮಾತೆಲ್ಲ ಮರೆತು
ನಿನ್ನ ಮೋಹಕ ಕಣ್ಣೋಟಕೆ ನಾನು ಸೋತು
ಎಲ್ಲೋ ಕಳೆದ್ಹೋದೆ ನನ್ನ ನಾ ಮರೆತು

ನಾನು ನಿನ್ನೆದುರು ಬಂದು
ಮನದಾಸೆ ಹೇಳಲಾಗದೆಂದು
ತಂದಿರುವೆ ಕಣ್ಣಂಚಲ್ಲಿ  ಬರೆದು
ನೀ ಓದುವವರೆಗೂ ರೆಪ್ಪೆ ಮಿಟುಕಿಸೆನು ಈಗ
ಓದಿ ಕಂಗಳಿಗೆ ವಿಶ್ರಾಂತಿ ನೀಡು ಬೇಗ 
                                        
                                        ಆರ್. ಆರ್. ಅಶಾಪುರ್

ಗೆಳೆಯನ ನೆನಪು

ಸದ್ದು ನಿದ್ದೆಹೋಗಿ ಮೌನ ಎದ್ದು ನಿಂತಿತ್ತು
ಅಂಧಕಾರವು ಬೆಳಕನ್ನು ಮೆಟ್ಟಿ ನಿಂತಿತ್ತು
ಮನಸಿಗೆ ಮಂಕು ಕವಿದು ಸುಮ್ಮನೆ ಮಲಗಿತ್ತು
ಅಂದು ನನ್ನ ಗೆಳೆಯನ ಉಸಿರು ನಿಂತಿತ್ತು .

ಗೆಳೆಯನ ನೆನಪುಗಳು  ಮನ ಕಲಕುತಿತ್ತು
ಆಡಿ ನಲಿದ ದಿನಗಳು ಕಣ್ಣೆದುರು ನಿಂತಿತ್ತು
ಮನಸ್ಸು ಮಗುವಿನಂತೆ ಬಿಕ್ಕಿ ಬಿಕ್ಕಿ ಅಳುತ್ತಿತ್ತು
ಅಂದು ನನ್ನ ಗೆಳೆಯನ ಉಸಿರು ನಿಂತಿತ್ತು .

ಬರಸಿಡಿಲು ಎದೆಗೆ ಅಪ್ಪಳಿಸಿದಂತಿತ್ತು
ಬಿರುಗಾಳಿಗೆ ಸಿಲುಕಿ ತತ್ತರಿಸಿದಂತಿತ್ತು
ಗೆಳೆಯನಿಲ್ಲದ ಜೀವನ ಇನ್ನೇಕೆ ಎಂದೆನ್ನಿಸಿತ್ತು
ಅಂದು ನನ್ನ ಗೆಳೆಯನ ಉಸಿರು ನಿಂತಿತ್ತು
                                             ಆರ್. ಆರ್. ಅಶಾಪುರ್

ಇಂದಾದರು ನೀನು ಬರಬಾರದೇನು

ಬೆಳದಿಂಗಳ ಬಾನಲ್ಲಿ ಕಂಡ ಚಂದ್ರ ಮುಖಿ
ಕನಸಲ್ಲಿ ನಗುತ ಕಾಡುವ ಹಸನ್ಮುಖಿ
ಕಣ್ಣೆದುರು ಎಂದು ಬರುವೆ ನನ್ನ ಪ್ರಾಣ ಸಖಿ

ಸೂರ್ಯ ಮುಳುಗುವ ಹೊತ್ತು
ಇಬ್ಬರು ಜೊತೆಯಾಗಿ ಕೂತು
ಆಡೋಣ ನೂರೆಂಟು ಮಾತು
ಎಂದು ಕನಸಲ್ಲಿ ನೀ ನನಗಿತ್ತ ಮಾತು
ನಂಬಿ ನಿನ್ನ ದಾರಿ ಕಾದಿರುವೆ ನಾನು
ಇಂದಾದರು ನೀನು ಬರಬಾರದೇನು

ಮಳೆ ಸುರಿಯುವ ಸಮಯ
ನಾ ಬಂದು ನಿನ್ನ  ಸನಿಹ
ತಿಳಿಸುವೆ ಮನದ ಬಯಕೆಯ
ಎಂದು ಕನಸಲ್ಲಿ ನೀ ಕೊಟ್ಟ ಭಾಷೆಯ
ನಂಬಿ ನಿನ್ನ ದಾರಿ ಕಾದಿರುವೆ ನಾನು
ಇಂದಾದರು ನೀನು ಬರಬಾರದೇನು

                                         ಆರ್. ಆರ್. ಅಶಾಪುರ್

ಸ್ವತಂತ್ರ ಭಾರತ

ಸ್ವತಂತ್ರ ಭಾರತಕ್ಕೆ ಅರವತ್ನಾಲ್ಕು ವರುಷ
ಇನ್ನೂ ಬಿಸಿಲು ಕುದುರೆಯಂತಿದೆ  ಜನರ ಬದುಕಲ್ಲಿ ಹರುಷ |

ನಾಯಕರ ಹುಸಿ ಭರವಸೆ ಯಿಂದ ದುಃಖ ಅತಿಯಾಗಿದೆ 
ಸಮುದ್ರದಂತ ಪ್ರತಿ ಕಣ್ಣಲ್ಲಿ ಕಣ್ಣೀರೆ ಅಲೆಯಾಗಿದೆ
ದುಷ್ಟ ನಾಯಕರು ಕೊಚ್ಚಿಹೋಗುವಂತೆ
ಸಮುದ್ರದಾಳದಿಂದ ಸುನಾಮಿ ಹೊರಬೀಳಬೇಕಿದೆ ||

ದೇಶದೆಲ್ಲೆಡೆ ಬ್ರಷ್ಟತೆಯ ಕಂಡು ಮನಗಳು  ನೊಂದಿವೆ 
ಬೆಂಕಿಉಂಡೆಯಂತ ಮನಗಳಲ್ಲಿ  ನಿಟ್ಟುಸಿರೆ ಜ್ವಾಲೆ ಯಾಗಿದೆ
ಬ್ರಷ್ಟ ನಾಯಕರು ಸುಟ್ಟು ಹೋಗುವಂತೆ
ಜ್ವಾಲೆ ಜ್ವಾಲೆಯಿಂದ ಬೆಂಕಿ ಮಳೆ ಸುರಿಯಬೇಕಿದೆ  ||
                                   
                                       ಆರ್ ಆರ್ ಆಶಾಪುರ್

ಸಮಾನತೆಯ ಆಸೆ

ಜಗಕೆ ಅರಿವೆಂಬ ಮಳೆಸುರಿದು
ಜನರ ಮಸ್ತಕದಿ ಜಿನುಗಲಿ
ಅಸಮಾನತೆಯ ಕಳೆ ತೆಗೆದು
ಸಮಾನತೆಯ ಬೆಳೆ ಬೆಳೆಯಲಿ ||

ಅತಿವೃಷ್ಟಿ ಯಾಗಿ ಅಂತಸ್ತು ಕರಗಿ
ನಗನಾಣ್ಯವೆಲ್ಲ ಹರಿದಂಚಿ ಹೋಗಿ
ಬರಡಾದ ಬಡವನಂಗಳದಿ
ಸಿರಿತನದ ಮೊಳಕೆ ಹೊಡೆಯಲಿ ||

ಜಾತಿಬೇದವು ನೆರೆಯಲ್ಲಿ ಮುಳುಗಿ
ಮೂಢಾಚಾರವು ನೀರಲ್ಲಿ ಕರಗಿ
ರಸಋಷಿಯ ವಿಶ್ವಮಾನವ ಕನಸು
ಇಂದಿಗಾದರು ನನಸಾಗಲಿ ||

                                ಆರ್. ಆರ್. ಅಶಾಪುರ್

ಸುಳ್ಳು ಪ್ರೀತಿ

ಸಂತೋಷದ  ನನ್ನ ಬದುಕಿನಲಿ
ಪ್ರೀತಿ ಮಾಡಿ ನಾ ಹಾಳಾದೆ
ನಗುವೇ ದೂರಾಗಿ ದುಖಃವು ಜೊತೆಯಾಗಿ
ಏಕಾಂಗಿ ನಾ ಆಗ್ಹೋದೆ ||

ಎಲ್ಲಿಂದ್ಲೋ ನೀನು ಸನಿಹಕೆ ಬಂದು
ಪ್ರೀತಿಯ ಖಡ್ಗವ ತಂದೆ
ಹುಸಿ ಪ್ರೇಮದಿಂದ ಮಂಕು ಮಾಡಿ ನನ್ನ
ಖಡ್ಗದಿ ಯಾಕೆ ನೀ  ಕೊಂದೆ
ನಿನ್ನ ಸುಳ್ಳು ಪ್ರೀತಿಗೆ ಬಲಿ ಆಗಿ ಹೋದೆ
ಉಸಿರಾಡುವ ಹೆಣವಾದೆ |
ನಗುವೇ ದೂರಾಗಿ ದುಖಃವು ಜೊತೆಯಾಗಿ
ಏಕಾಂಗಿ ನಾ ಆಗ್ಹೋದೆ||

                                                   
                              ಆರ್. ಆರ್. ಅಶಾಪುರ್

ಸಾವಿನ ಸುತ್ತ

ಬದುಕಿರುವವರೆಗೂ ಸಾವಿನಾ ಚಿಂತೆ
ಹೋಗುವ ಕಾಲಕೆ ಬದುಕಿನ ಚಿಂತೆ
ಹೊತ್ತಿರುವೆವು ನಾವು ಪಾಪ ಪುಣ್ಯಗಳ ಕಂತೆ
ಅದಕೆಲ್ಲ ಉತ್ತರ ಇಲ್ಲೇ ಪಡೆಯಬೇಕಂತೆ ||

ಸಾವಿನಾಚೆಯ ಊರು ಕಂಡವರು ಯಾರು
ಸ್ವರ್ಗ ನರಕಗಳ ಊಹೆಗಳು ನೂರಾರು
ಸ್ವರ್ಗದಾನಂದದಲಿ ಮಿಂದು ಬಂದವರಿಲ್ಲ ಎದುರಿನಲಿ
ನರಕದ ಬೇಗೆಯಲಿ ಬೆಂದು ಬಂದವರಿಲ್ಲ ಆಸು  ಪಾಸಿನಲಿ||

ಸಾವಿನಾ ಸುತ್ತ ಅಂತೆ ಕಂತೆಗಳ ಭೂತ
ಇಲ್ಲಿಹುದು ನನಗೆ ತಿಳಿದಿರುವ ಅರ್ಥ
ಸಾವು ಬಂದಾಗ ನಮ್ಮ ದೇಹ ಕಾಣುವುದು ಅಂತ್ಯ
ಆತ್ಮ ಹುಡುಕುತಾ  ಹೊರಡುವುದು ಹೊಸ ದೇಹದಾ ಸಾಂಗತ್ಯ ||

                                              ಆರ್. ಆರ್. ಅಶಾಪುರ್

ನಮ್ಮೊಂದಿಗಿದ್ದು ನಮ್ಮಂತಾಗದವರು...

ಹೊಟ್ಟೆಪಾಡಿಗಾಗಿ ಶಾಲೆಯ ಮರೆತವರು
ನಮ್ಮೊಂದಿಗಿದ್ದು ನಮ್ಮಂತಾಗದವರು

ಸಂದಿ ಗುಂದಿಯಲ್ಲಿ ಚಿಂದಿ ಗಿಂದಿ ಆಯ್ದು
ತಿಪ್ಪೆ ಗೊಂಡಿಯಲ್ಲಿ ಎಂಜಲನ್ನು ತಿಂದು
ದೊಡ್ಡ ದೊಡ್ಡ ಮೂಟೆ ಹೆಗಲಮೇಲೆ ಹೊತ್ತು
ಮಳೆ ಬಿಸಿಲಿನಲ್ಲಿ ಬೀದಿಯಲ್ಲಿ ನಿಂತು
ಹೊಟ್ಟೆಪಾಡಿಗಾಗಿ ಶಾಲೆಯ ಮರೆತವರು
ನಮ್ಮೊಂದಿಗಿದ್ದು ನಮ್ಮಂತಾಗದವರು||

ಸೂರ್ಯ ಹುಟ್ಟೋ ಮುಂಚೆ ಹಾಲು ಪ್ಯಾಕೆಟ್ ಹಾಕಿ
ದಿನವು ಸೈಕಲ್ ಹತ್ತಿ ಪೇಪರನ್ನು ಹಾಕಿ
ಅಂಗಡಿ ಮನೆಯಲ್ಲಿ ಕಸ ಮುಸುರೆ ಮಾಡಿ
ಗ್ಯಾರೇಜ್ ಹೋಟಲ್ ನಲ್ಲಿ ಕೂಲಿ ನಾಲಿ ಮಾಡಿ
ಹೊಟ್ಟೆಪಾಡಿಗಾಗಿ ಶಾಲೆಯ ಮರೆತವರು
ನಮ್ಮೊಂದಿಗಿದ್ದು ನಮ್ಮಂತಾಗದವರು||
                                          ಆರ್. ಆರ್. ಅಶಾಪುರ್

ಸ್ನೇಹದ ಕಡಲಲ್ಲಿ, ನೆನಪಿನ ದೋಣಿಯಲಿ

ಶಾಲೆಯಲ್ಲಿ, ಕಾಲೇಜಿನಲ್ಲಿ ಒಬ್ಬರನ್ನೊಬ್ಬರು ಕಾಲೆಳೆಯುತ್ತಾ, ಕೀಟಲೆ ಮಾಡುತ್ತ, ನಕ್ಕು ನಲಿಯುತ್ತ, ಮೋಜು ಮಸ್ತಿ ಮಾಡುತ್ತ ಇದ್ದಾಗ ತಿಳಿಯದ ಸ್ನೇಹದ ಬೆಲೆ ,ಒಂಟಿಯಾಗಿ ಕಾಲೇಜಿನ ಕಡೆಗೆ ಹೊರಟಾಗ, ಮನಸ್ಸು ತನ್ನಷ್ಟಕ್ಕೆ ತಾನೆ ಕಳೆದ ಅ ಕ್ಷಣಗಳನ್ನು ನೆನೆದು ನನ್ನ ಕಣ್ಣುಗಳು ವದ್ದೆಯಾದಾಗ ತಿಳಿಯಿತು.

ನಾವು ನಮ್ಮ ಬಿಡುವಿಲ್ಲದ ಕೆಲಸದಲ್ಲಿ ಸಿಲುಕಿ,  ಸ್ನೇಹಿತರನ್ನು ಕಾಣಲು,ಕಾಲ್ ಅಥವಾ ಮೆಸೇಜ್   ಮಾಡಲು  ಸಮಯವಿಲ್ಲದಿರಬಹುದು. ಆದರೆ ನಮಗೆ ಸ್ನೇಹಿತರ ನೆನಪಾಗದ ದಿನಗಳು ಮಾತ್ರ ಇಲ್ಲ. ಆಫೀಸ್ ಗೆ ಹೋಗುವ  ದಾರಿಯಲ್ಲಿ ಸ್ನೇಹಿತರ ಗುಂಪು ಕಂಡಾಗ, ಕಾಲೇಜ್ ಬಸ್ಗಳನ್ನು ಕಂಡಾಗ, ಬೈಕ್ ನಲ್ಲಿ ಮೂರು ಜನ ಕಲಾಜ್ ಸ್ಟುಡೆಂಟ್ಸ್ ಕೂತು ಹೋಗುವುದನ್ನು ಕಂಡಾಗ,ಪಕ್ಕದ ಮನೆಯಲ್ಲಿ ಯಾರೋ ಪರೀಕ್ಷೆಗೆಂದು ಗಟ್ಟಿಯಾಗಿ ಓದುತ್ತಿರುವುದು ಕೇಳಿಸಿದಾಗ, ಮನೆಯಲ್ಲಿ ಒಂಟಿಯಾಗಿ ಕೂತಾಗ ನೆನಪಾಗುವುದು ಮತ್ಯಾರು  ಅಲ್ಲ, ಖಾಲಿ ಪುಟದಂತಿದ್ದ ಜೀವನವನ್ನು  ಮಧುರವಾದ ನೆನಪುಗಳಿಂದ ಭರ್ತಿ ಮಾಡಿದ   ಆ ನನ್ನ ಸ್ನೇಹಿತರು.

                                                                                       ಆರ್. ಆರ್. ಅಶಾಪುರ್